Ang Itak sa Puso ni Mang Juan

             Una kong nakita ang larawan ng pintang ito noong isang taon sa subject namin na Humanities. Likha ito ni Antipas Delotavo, isang social realist. Kung tama ang pagkakatanda ko, ang Social Realism ay masasabi na isang artistic movement na gumagamit ng artistiko o masining na paraan upang maipahayag o maipakita ang mga problemang nangyayari sa ating kapaligiran.

            Maraming pwedeng maiparating na mensahe ang pinta, depende sa persepsyon ng tumitingin. Para sa akin may dalawang ipinahahatid na mensahe ang likhang ito. Una ay ang pagpapahirap na ginagawa ng mga kapitalista sa ating mga Pilipino. Katulad ng Coca-Cola na ginamit na representasyon, ang mga kapitalista ang syang utak ng mga pagtaas ng bilihin ang kumikitil o “sumasaksak” sa ating Pilipino. Samantalang si Mang Juan, wala man lang kalaban-laban. Tumatanda na lang na ang tanging dinadanas ay gutom at kahirapan.

                Ang pangalawang mensahe na nakita ko sa likha ni Delotavo ay ang epekto colonial mentality sa ating mga Pilipino. Katulad ng Coca-Cola na ginamit na representasyon, nabubulag na tayo sa mga produkto na gawa sa ibang bansa. At magugulat na lang tayo na nasaksak na nito ang ating mga puso’t isipan at napatay na nito ang ating pagka- Pilipino.