Ang pinakapaborito kong gusali sa aming unibersidad ay ang library o ang Edilberto P. Dagot Hall. Gustung-gusto ko yung napakalaking chandelier na gawa sa capiz doon sa bulwagan. Idagdag mo pa ang mga imahe ng mga kilalang pinta na matatagpuan sa bawat palapag. Kailan ko lang nalaman na donasyon pala yun ng isang mapagkawanggawang mayaman.
Isa sa mga pinta doon ay ang likha ni Edgar Degas na The Dance Class. Si Edgar Degas ay isang Impressionist. Ang termino ay hango sa isa sa mga pinta ni Claude Monet na Impression: Sunrise. Ibig sabihin, ipinipinta ng isang Impressionist ang mga bagay na kanyang naranasan o nasaksihan sa pamamagitan ng maiiksi, at putul-putol na pagguhit ng brush at paglalaro sa epekto ng ilaw.
Sa aking pagsasaliksik na nalaman kong ang setting ng pinta ay ang Palace Garnier sa Paris, ang tahanan ng Opera House at ng ballet. Kapansin-pansin sa pinta ang mga batang babae na sa ayos at postura ng katawan ay halata na matagal na silang nagsasanay. Kita rin sa pinta ang isang matandang lalaki na ang sa tingin ko ay ang kanilang master na mukhang masungit at istrikto.
Sa kabila ng murang edad,dumadaan sila sa isang matinding pag-eensayo at marahil araw-araw pa ito kaya naman hindi na sila nakakapasok sa paaralan. Ginagawa nila ang lahat at nagpapakahirap upang sa gayon ay makasama sila sa mga nakapagtatanghal sa opera. Isang bagay na mahirap gawin para sa isang babaeng nas murang edad pa lamang.
No comments:
Post a Comment