Magic Word: Chenelyn! Chenelyn!

            Lahat marahil ng bata at dumaan sa pagkabata ay naniniwala sa kapangyarihan  ng mahika. Nahihiwagaan kung paano nangyari ang ganito at kung paano naging ganoon ang mga bagay- bagay. Lahat ng bata at siguro hanggang sa ngayong matanda na, may itinuturing at paboritong  ‘superhero’ na nagagawa lahat ng imposible. Si Superman na nakakalipad at may taglay na kakaibang lakas. Si Spiderman na nakakapaglabas ng sapot mula sa kamay o di kaya naman si Wonder Woman na nagtataglay na lubid ng katotohanan.

            Ang Chenelyn! Chenelyn! ay tumatalakay sa sensitibong isyu ng pagtrato sa mga kasambahay. Tungkol ito isang bata kung saan siya’y naniniwala na ang kanilang kasambahay na si Chenelyn ay may taglay na mahika. Dahil sa tuwing sasambitin ang ngalan nito bigla na lang matitimplahan ng kape ang kanyang itay, bigla na lang makikita ang nawawalang relos ng kanyang kuya, agad-agad na maihahanda ang susuotin ng kanyang ate o di kaya naman bigla na lamang mahuhugasan ang mga pinggan ng kanyang inay. Hanggang sa isang araw na kahit anong gawin nilang sambit ng kanyang pangalan, wala pa ring mahikang nangyayari. Nagka-trangkaso na pala si Chenelyn. Dito na nila ipinasya na oras na para si Chenelyn naman ay kanilang pagsilbihan bilang sukli sa kasipagan na ipinakita ni Chenelyn sa kanilang pamilya.

            Mahirap gawing konsepto para sa isang kwentong- pambata ang ganitong klase ng mga isyu, hindi kasi natin alam kung talagang maiintindihan ng isang bata ang ipinararating nito. Kaya naman saludo ako sa ginawang pagkukuwento ni Rhandee Garlitos dahil nagawa niyang magaan at madaling maintindihan para sa isang bata ang konsepto. Kinikiliti nito ang imahinasyon ng mga bata dahil sa mga salitang pinili niya, isama pa ang magandang ilustrasyon ni Liza Flores na talaga namang nakatulong sa pagbuo ng konsepto sa isip ng mga bata.

Epektibo ito para sa pagtuturo sa mga bata na kahit ano pa ang trabaho ng isang tao, importante ay ang pag-respeto sa kanila at pag-papasalamat sa serbisyo at mga tulong na kanilang ginagawa. Na lahat ng tao, basta ginagawa at naglilingkod ng maayos ay isang superhero.